ḳhayāl meñ hai jo chehra nazar bhī aa.egā

vo apne ghar se kabhī mere ghar bhī aa.egā

bichhaḌte vaqt kā manzar bhī dhyān meñ rakhnā

safar meñ kaam ye raḳht-e-safar bhī aa.egā

nikal to aa.e haiñ zindān-e-tīrgī se magar

ye sochte haiñ hameñ kuchh nazar bhī aa.egā

sabhī na ghar ke darīchoñ se bach ke guzreñge

havā kā koī to jhoñkā idhar bhī aa.egā

malāl sāya-e-dīvār-o-dar abhī se kyā

ye marhala to sar-e-rahguzar bhī aa.egā

mirī navā to kabhī rā.egāñ nahīñ jaatī

agar vo ghar meñ huā baam par bhī aa.egā

kise gumān thā 'ḳhāvar' vahāñ kī miTTī meñ

yahāñ kī āb-o-havā kā asar bhī aa.egā