tū kyuuñ paas se uTh chalā baiThe baiThe
huā tujh ko kyā bevafā baiThe baiThe
vo aate hī aate rahe par qalaq se
mirā kaam hī ho gayā baiThe baiThe
uThāte ho kyuuñ apnī mahfil se mujh ko
liyā maiñ ne kyā aap kā baiThe baiThe
kare sa.ī kuchh uTh ke us kū se ai dil
ye hāsil huā mudda.ā baiThe baiThe
vo is lutf se gāliyāñ de ga.e haiñ
kiyā karte haiñ ham duā baiThe baiThe
zarā ghar se bāhar nikal maan kahnā
na hogā koī mubtalā baiThe baiThe
na uTThā gayā dil ke hāthoñ se 'taskīñ'
kahā us ne jo sab sunā baiThe baiThe