dil meñ tujh ko shumār kar luuñ maiñ

ho ijāzat to pyaar kar luuñ maiñ

is ḳhizāñ ko sameT lo tum to

mausam-e-ḳhush-gavār kar luuñ maiñ

ishq agar jurm hai to jurm-e-sanam

be-sabab be-shumār kar luuñ maiñ

tum ne va.ada kiyā hai aane kā

do ghaḌī intizār kar luuñ maiñ

saarī duniyā ko jiit luuñ pal meñ

tujh pe gar iftiḳhār kar luuñ maiñ

haath hāsil se phir milā.ūñgā

pahle dariyā to paar kar luuñ maiñ

kyā mulāqāt phir kabhī hogī

yā use yādgār kar luuñ maiñ