sub.h likhtī hai tirā naam mirī āñkhoñ meñ
qaid tanhā.ī kī hai shaam merī āñkhoñ meñ
niiñd aatī hai duā de ke chalī jaatī hai
ashk jab kartā hai ārām mirī āñkhoñ meñ
ab tire naqsh-e-kaf-e-pā ko miTāne ḳhushbū
aa.ī hai gardish-e-ayyām mirī āñkhoñ meñ
do qadam saath chale tab to batā.ūñ us ko
hai tirī manzil-e-gum-nām mirī āñkhoñ meñ
tujh ko auroñ se chhupāyā hai hamesha lekin
saaf dikhātā hai tirā naam mirī āñkhoñ meñ
phir se āġhāz-e-mohabbat maiñ karūñ to kaise
qaid haiñ ishq ke anjām mirī āñkhoñ meñ