ġham meñ ahd-e-shabāb jaatā hai
āsmāñ ḳhaak meñ milātā hai
kaun gul bahr-e-sair aatā hai
baaġh phūlā nahīñ samātā hai
arsh par bhī ġhubār jaatā hai
dil jo vahshat meñ ḳhaak uḌātā hai
jaan detā hai sabza-e-ḳhat par
ḳhizr har roz zahr khātā hai
teġh-e-qātil jo ho ga.ī be-āb
zaḳhm paanī magar churātā hai
zinde marte haiñ murde jiite haiñ
jab vo rashk-e-masīh gaatā hai
sahar-e-shām-e-vasl hai shab-gor
maut aatī hai yaar jaatā hai
achchhī paḌtī hai jab koī talvār
dahan-e-zaḳhm muskurātā hai
ḳhūn-e-ushshāq kā uThā biiḌā
be-sabab kab vo paan khātā hai
jigar-e-sañg ho jahāñ paanī
vo vahāñ mujh ko āzmātā hai
tū jo gul hai to maiñ bhī shabnam huuñ
mujhe hañsnā tirā rulātā hai
ḳhush ye marne se huuñ mirā lāsha
gor meñ bhī nahīñ samātā hai
lāla-e-koh se huā sābit
ḳhūn-e-fariyād josh khātā hai
laakh taqlīd kījiye ai 'arsh'
par kab andāz-e-'mīr' aatā hai