patthar ke jigar vaalo ġham meñ vo ravānī hai

ḳhud raah banā legā bahtā huā paanī hai

ik zehn-e-pareshāñ meñ ḳhvāb-e-ġhazalistāñ hai

patthar kī hifāzat meñ shīshe kī javānī hai

dil se jo chhaTe bādal to aañkh meñ sāvan hai

Thahrā huā dariyā hai bahtā huā paanī hai

ham-rañg-e-dil-e-pur-ḳhūñ har lāla-e-sahrā.ī

gesū kī tarah muztar ab raat kī raanī hai

jis sañg pe nazreñ kiiñ ḳhurshīd-e-haqīqat hai

jis chāñd se muñh moḌā patthar kī kahānī hai

ai pīr-e-ḳhirad-mandāñ dil kī bhī zarūrat hai

ye shahr-e-ġhazālāñ hai ye mulk-e-javānī hai

ġham vaj.h-e-figār-e-dil ġham vaj.h-e-qarār-e-dil

aañsū kabhī shīsha hai aañsū kabhī paanī hai

is hausla-e-dil par ham ne bhī kafan pahnā

hañs kar koī pūchhegā kyā jaan gañvānī hai

din talḳh haqā.eq ke sahrāoñ kā sūraj hai

shab gesū-e-afsāna yādoñ kī kahānī hai

vo husn jise ham ne rusvā kiyā duniyā meñ

nādīda haqīqat hai nā-gufta kahānī hai

vo misra-e-āvāra dīvānoñ pe bhārī hai

jis meñ tire gesū kī be-rabt kahānī hai

ham ḳhushbu-e-āvāra ham nūr-e-pareshāñ haiñ

ai 'badr' muqaddar meñ āshufta-bayānī hai