udāsī āsmāñ hai dil mirā kitnā akelā hai

parinda shaam ke pul par bahut ḳhāmosh baiThā hai

maiñ jab so jā.ūñ in āñkhoñ pe apne hoñT rakh denā

yaqīñ aa jā.egā palkoñ tale bhī dil dhaḌaktā hai

tumhāre shahr ke saare diye to so ga.e kab ke

havā se pūchhnā dahlīz pe ye kaun jaltā hai

agar fursat mile paanī kī tahrīroñ ko paḌh lenā

har ik dariyā hazāroñ saal kā afsāna likhtā hai

kabhī maiñ apne hāthoñ kī lakīroñ se nahīñ uljhā

mujhe ma.alūm hai qismat kā likkhā bhī badaltā hai