ḳhushbuoñ kā shahr ujḌā ghar se be-ghar ho ga.e
bādshāhat haath se niklī gadāgar ho ga.e
tīrgī meñ jā paḌe raushan taqāze sub.h ke
jhuuT sachche the jabhī logoñ ko azbar ho ga.e
jitne arse ham rahe ḳhud-sar anā ke zer-e-pā
zarre sūraj ban ga.e qatre samundar ho ga.e
thā qusūr apnā yahī bas aa.ina shāne pe thā
chehre kyā ubhre sabhī aape se bāhar ho ga.e
jaane kis kī bad-duā 'parvez'-rahmānī lagī
dekhte hī dekhte ahbāb patthar ho ga.e