shab-gazīda ke ghar nahīñ aatī

ḳhvāb meñ bhī sahar nahīñ aatī

kyā suneñ des kī sunā.eñ kyā

koī achchhī ḳhabar nahīñ aatī

ā.īna dūsroñ kī jānib hai

apnī sūrat nazar nahīñ aatī

aap muñh meñ zabān rakhte haiñ

baat karnī magar nahīñ aatī

dars dete haiñ vo mohabbat kā

jin ko zer-o-zabar nahīñ aatī

merī qismat hai yā pachhal-pīrī

lauT jaatī hai ghar nahīñ aatī

bin tire kuchh nazar nahīñ aatā

tujh ko 'atiya' nazar nahīñ aatī