salīqa bolne kā ho to bolo
nahīñ to chup bhalī hai lab na kholo
ḳhamoshī kā koī to bhed kholo
jo lab khulte nahīñ āñkhoñ se bolo
adāvat koī paimāna nahīñ hai
mohabbat ko mohabbat hī se tolo
qayādat kā ye matlab to nahīñ hai
ki jo aage ho us ke saath ho lo
bahut se ġham chhupe hoñge hañsī meñ
zarā in hañsne vāloñ ko TaTolo
jab āñkheñ mich ga.iiñ tab aa ke bole
sirhāne ham khaḌe haiñ dekh to lo
baḌī qātil nazar kā sāmnā hai
'vaqār' ab jaan o dil se haath dho lo