Tags-Aaina

aur imroz kā ā.īna ye kahtā hai ki dekh
ādmī-zāde tirī umar kī shaam aa pahuñchī

ab dhanak-rañg bahut saaf nazar aate haiñ
apne ā.īne meñ aa.ī hai jilā pahlī baar

aql kī saiqal se ho jaatā hai paak
dil ke ā.īne ko jab lagtā hai zañg

ā.īna dekhe hai vo aur use ā.īna
zor aalam hai dilā ālam-e-hairānī kā

hāthoñ meñ vaqt ke to koī sañg bhī na thā
kyuuñ TuuT kar bikhar ga.e ā.īna-vār log

dil kā ā.īna rū-e-āshiq hai
is se zāhir hai be-kasī dil kī

hairat ne merī ā.īna un ko banā diyā
kyā dekhte ki rah ga.e vo dekh kar mujhe

'baqā' ke dil meñ aa ā.īna terī qadr kyā jaane
abas hai naqsh-e-gul gar bulbul-e-tasvīr par likkhā

jo shuā-e-lab hai mauj-e-nau-bahār-e-naġhma hai
ḳhāmushī bhī aap kī ā.īna-dār-e-naġhma hai

ā.īna dekh kar na to shīshe ko dekh kar
hairān dil hai aap ke chehre ko dekh kar

dam-e-ruḳhsat agar maiñ hausle se kaam letā
palaT kar dekh saktā thā use ā.īna merā

saare imkānāt meñ raushan sirf yahī do pahlū
ek tirā ā.īna-ḳhāna ik merī hairānī

aap Darte haiñ ki khul jaa.e na aslī chehra
is liye shahr ko ā.īna banāne na diyā

ḳhud ko dekhūñ tirā chehra dekhūñ
ā.īna toḌ duuñ phir kyā dekhūñ

aks se apne vo yuuñ kahte haiñ ā.īne meñ
aap achchhe haiñ magar aap se achchhā maiñ huuñ

us ke partav se huā hai zāfrānī rañg kā
ā.īna to aaj bhī hai kahkashānī rañg kā

apnī aag ko zinda rakhnā kitnā mushkil hai
patthar biich ā.īna rakhnā kitnā mushkil hai

dil hī nahīñ vo dil jo haqīqat meñ ham-nashīñ
ā.īna-dār-e-azzat-e-irfāñ nahīñ huā

hai takallum ā.īna ehsās kā
jis kī jaisī soch ho vaisā kahe

rah-e-talab meñ junūñ ne akasr shu.ūr ko ā.īna dikhāyā
jise thā uzr-e-shikasta-pā.ī vo ab sitāroñ pe chal rahā hai