Tags-Aansoo

chupke chupke raat din aañsū bahānā yaad hai
ham ko ab tak āshiqī kā vo zamānā yaad hai

'gulnār' zabt-e-ġham kī ye intihā bhī dekhī
dāman bhigo rahe haiñ aañsū nikal nikal kar

buuñd girī thī jalte mausam ke hoñToñ par
aañkh meñ aañsū dil meñ sho.ala vāpas aayā

bahā.e baiThī hai aañsū lahū ke chandni-chowk
karol-bagh ke dil meñ qaroliyoñ kī nok

mere aañsū piine shaam ko ik chiḌiyā
merī god meñ aa baiThe uḌ kar chup-chāp

mere lafzoñ ko mil ga.ī āñkheñ
saare aañsū laboñ se bahne lage

āñkhoñ meñ jitne aañsū the
motī ban ga.e Dhalte Dhalte

husn kī sañgat phuul kī rañgat se mas ho kar
shabnam kā aañsū āveza ho jaatā hai

ubhre hue chhāle haiñ hai rokā huā aañsū
bas bujh chukī ye aag ki paanī se lagī hai

hai pighlī huī aag ki jalte hue aañsū
luukā vahīñ uThā hai jahāñ buuñd paḌī hai

jaltā thā siina merā ai sham.a tis pe tū ne
duunī lagā.ī ātish aañsū bahā bahā kar

haTo kāñdhe se aañsū poñchh Daalo vo dekho rail-gāḌī aa rahī hai
maiñ tum ko chhoḌ kar hargiz na jaatā ġharībī mujh ko le kar jā rahī hai

ab dil kī tamannā hai to ai kaash yahī ho
aañsū kī jagah aañkh se hasrat nikal aa.e

muddat ke ba.ad us ne jo kī lutf kī nigāh
jī ḳhush to ho gayā magar aañsū nikal paḌe

musalsal hādsoñ se bas mujhe itnī shikāyat hai
ki ye aañsū bahāne kī bhī to mohlat nahīñ dete

tārīḳh batā.egī vo qatra hai ki dariyā
aañsū hai abhī vaqt ke qadmoñ meñ paḌā hai

vo sitārā jo mire naam se mansūb huā
dīda-e-shab meñ hai ik āḳhirī aañsū kī tarah

is duniyā meñ kaam na aa.e
aañsū tere aañsū mere

sub.h-dam jū-e-ḳhūñ kaise vo ban ga.e
ham jo aañsū bahāte rahe rāt-bhar

ik aañsū hī to Tapkā thā zamīñ par
vahīñ niklā tumhārā āstāñ kyuuñ